Bill Clinton Jo Buyuang Kalintin....!

Tibo-tibo se, Aran tagopoh-gopoh mahampiri Garan nan sadang asik maota di lapau Mindin. Tantu sajomambuek kasado urang nan sadang serius dalam ota pagi tu takajuik.
“Oih.. Garan, iko ado kaba spektakuler mah. Baru dan shahih,” kecek Aran dalam angok nan mahambuih-hambuih.

“Hah.?, kaba apo pulo tuh mang, mangko dek angku tagaropoh cando dikaja dek hantu aru-aru ?,” tanya Garan satangah cameh, dek dicalieknyo Aran baitu sajo mandudu cando urang dikaja hantu.

“Iko iyo kaba nan dapek mambuek heboh dunia,” kecek Aran pulo.
“Ala…., palieng-palieng curito mancik dek kuro’, semode nan ka patang tu,” jawek Garan, satangah manceme’eh.

“Ndak baitu do, den pasan kopi malah daulu ka urang lapau. Din…, kopi saketek gulo sakarek. Buek kini yo….,” hariek Aran.
“Nah, co iko kaba nan den danga sabanta ko,” kecek Aran mamulai bacurito.

“Sabananyo, Bill Clinton tuh urang awak juo mah. Anak urang Batang Tabiek,” kecek Aran.
“Alah gilo pulo ang kini mah. Dima pulo tibonyo Bill Clinton tu urang Batang Tabiek,” kecek Mindin sambie malatak an kopi nan dipasan dek Aran.
“Eeeh, iko iyo sabana kaba sahih mah nDin,” jawek Aran.

“Dima pulo ota nan ka dapek disamo an jo hadist sahih. Iyo lah tabaliek wa ang ko mah,” pinteh Garan.
“Kalian ka mandanga kaba ko atau indak ?” tanyo Aran buak.

“Jadi lah……, jan nah sampai co itu bana buaknyo Ran,” jawek Mindin nan lah sato pulo duduak dalam majelis ota pagi.

“Iko nan sabananyo lah. Di Batang Tabiek ado urang gaek banamo mak Nirin. Nah mak Nirin ikolah nan mancurito an ka den parak siang cako, sambie maisak tangih. Nan keceknyo, inyo taragak ka anaknyo nan surang lai,” kecek Aran mamulai curitonyo.

“Eh…, mak Nirin mantan kusie mukasuik wa ang tu ?” tanyo Garan nan lah mulai tabaok dek ota Aran.
“Iyo nan itu. Nan rumahnyo sabalah suok malkiek awak ka Sungai Kamuyang. Tapi inyo daulu jadi kusie.
Kini nyo lah gaek, lah sambilan puluh tigo umuanyo,” jawek Aran.

“A.iyo nan itu mukasuik den. Nah jadi ba a baliau tuh ?” tanyo Garan.
“Mak Nirin ko kan punyo anak banamo Buyung Kalintin. Kini karajo di kalatek tuh. Tapi, nyatonyo, mak Nirin ko bukan taragak ka Buyuang Kalintin nan di Pakan Baru tu. Inyo taragak ka anaknyo nan ciek lai,” kecek Aran.

“Di ma pulo lah mak Nirin tuh punyo anak ciek lai. Lah jaleh anaknyo surang tu mah. Iko iyo kaji nan indak ka mungkin sajo dek ang mah Ran,” pinteh Mindin capek.

“Nan satahu den iyo surang tuh anak mak Nirin. Tapi nyatonyo mah, inyo bacurito ka den, bahwasannyo inyo punyo duo urang anak jantan. Nah, curitonyo co iko,” sambuang Aran mulai masuak ka curito nan sabananyo.

“Kutiko itu, masih jaman kito dijajah dek Balando, dan mak Nirin masieh manambang bendi. Kaduo anaknyo tuh, pai mandi ka pamandian Batang Tabiek. Nah, kutiko itulah kaduo anak mak Nirin cako, basobok jo turih urang Amerika. Kironyo, si turih tu, jatuah kasieh dek mancaliek ado anak kamba di pamandian. Langsuang sajo inyo batanyo ka paja kamba, nan indak lain adolah Buyuang Kalintin jo

Buyuang Kalinton. Anak sia paja tuh kaduonyo, dan dima rumahnyo. Satalah tu……,” Aran mahanti an curitonyo. Diambieknyo galeh barisi kopi, di salai nyo duduik anau nan alah nyo pilin sajak tadi. Samantaro tu, nan mandanga lah indak saba mananti an curito tu basambuang.

“Nah, baitu hari sanjo, kutiko alah ampiang mugarik tibo, si turih Amerika tu batandang ka rumah mak Nirin. Di sinan, inyo curitokanlah mukasuik hatinyo buek ma ambiek salah satu dari anak mak Nirin tuh. Sabab, manuruik curito mak Nirin, turih tu indak bakaturunan. Mangkonyo inyo mamintak ka mak Nirin anak nan ado di inyo.

Satalah lamo di inok-inok an, akhienyo, mak Nirin marelakan anaknyo nan banamo Buyuang Kalindon di baok dek turih Amerika tu. Sabab, alasan mak Nirin, inyo urang nan hiduik susah, takuik indak ka talok manyikolah an anaknyo sakali duo.

Nah, jadi, kini mak Nirin tuh, lah taragak bana ka anaknyo nan surang lai tuh. Bahkan kaba nan inyo padapek dari ota-ota urang, bahwasannyo anaknyo nan banamo Buyuang Kalinton tuh, sewakatu tibo di Amerika lah baganti namo. Namun samantangpun baitu, bia namo pambarian urang tuonyo indak ilang, mako di barilah si Buyuang Kalinton namo baru, banamo Bill Clinton.

Sabab ba a dek baitu ? Nan namonyo Buyuang itu kan untuk anak jantan di kito. Bia indak marubah arati, apak angkek si Kalinton ma agieh namo baru nan agak ba sasuaian,” ota si Aran.

Tantu sajo urang nan mandang tuh abih galak ka sadonyo.

“Ota ang mah Aran. Kecek den kok iyo kaba sahih, kironyo ota balecoh nan ang sampai an ka kami,” kecek Mindin di antaro galaknyo nan gadang.
“Eh…., iko tabukti mah !” sagah Aran indak namuah kalah.
“Alah tuh Ran, jan ba ota an juo lei,” sawuik Garan.

“Buktinyo, sewakatu Bill Clinton jadi Parasiden Amerika, inyo indak namuah manyarang Afghan. Sabab ba a dek baitu. Inyo tuh asanyo urang Islam juo mah. Makonyo inyo indak ado mambagak ka nagara Islam sewakatu inyo jadi parasiden.

Apo lai, rawuik wajahnyo, iyo agak saragi jo Buyuang Kalintin nan karajo di Kalatek tuh. Bisa jadi inyo itu iyo anaknyo mak Nirin nan lah di ambiek dek turih nan sari,” kecek Aran manyudahi otanyo sambie mahiruik kopinyo nan lah tambah dingin.

karya : Sabir AD

Tweet

Subscribe to receive free email updates: