Nagari Rajo-Rajo Jo Urang Kayo

Tasabuiklah nagari di kaki gunuang Marapi nan tabasuik di tambo sabagai nagarinyo asa usua urang Minang. Di nagariko, mato pancaharian utamo panduduak mambaliak bumi alias batani. Mereka iduik di sinan sabana nyaman.

Pagi-pagi buto, sairiang jo kukuak ayam jantan, nan tuo-tuo alah dulu jago untuak sumbayang shubuah ka musajik. Dek udaro pagi taraso dingin di kaki gunuang marapi, mako nan mudo-mudo banyak nan masih bagaluang jo kain saruang sabalun pai mandi ka pincuran sadangkan anak –anak ketek banyak nan marengek jo mancebek katiko dijagoan urang gaeknyo dari lalok lamak.

Di antaro anak nagari di nan sapagi tu, tampaklah surang anak baumua tangguang turun dari janjang kayu rumah gadang ba-atok gonjong. Rambuiknyo panjang taurai di subalah balakang, sadangkan nan di kapalo subalah kida jo subalah suok, di dakek talingo, rambuiknyo balapiah ketek-ketek .

Kalau awak indak kulimek mancaliak bagian kapalo anak mudo ko mako awak ka manyangko inyo ko memang anak gadih. Di pagalangan tangannyo, tampak pulo galang-galang gadang bagalantuangan.

Untuangnyo dadonyo laie bidang, bahu badagok, katokah jalan lai sarupo ayam jantan sahinggo masih tampak gagah walau di bahu sabalah suok tagantuang kampia ketek di bawah katiak. Pakaiannyo taraso ganjia dicaliak sahinggo bisa disangko urang gilo. Ba-a pulo ka indak, badan nan gadang, bidang sarato badagok tu nyo tutuik-i jo baju kaos katun baragi batiak Jao balukisan pure Bali, sadangkan sarawanyo dipakainyo sarawa galembong hitam.

Di bagian kaki, tapaknyo dialehnyo jo tangkelek, tarompa dari kayu. Urang sakampuang alah apa di lua kapalo jo gaya anak mudo nan banamo si Kutar Johnson ko, indak ado nan heran lai sabab urang alah tahu si Kutar banyak bakawan jo Bulando-bulando nan kini dikecek-an urang bule. Kecek urang, karajonyo tu jadi guide atau pamandu wisata. Kalau ditanyo urang alasan si Kutar pakai sarawa galembong jo tangkelek, dijalehannyo ujuik mukasuiknyo untuak malestarikan sarato mampromosikan pakaian khas niniak moyang urang Minang.

Urang nan basobok jo si Kutar maraso heran manampak si Kutar alah segeh sapagi tu apolai katiko mancaliak inyo singgah duduak ka lapau. Padahal, biasonyo inyo langsuang tagak di tapi jalan manunggu oto nan ka mambaoknyo ka gaduang, tapeknyo ka kampuang Cino, sapalangkahan dari kaki jam gadang. Kini inyo masuak ka lapau dan duduak basamo-samo jo nan labiah tuo sambia mamasan kopi paik sagaleh.

Ikolah kaistimewaan si Kutar nan lain, sajak ketek, inyo alah diaja urang gaeknyo minum nan duo macam sajo, kok indak kopi paik piliahan partamo mako teh jo sampurehnyo jadi piliahan kaduo, tatap samo-samo indak bagulo. Nan lah labiah dulu tibo di lapau tantu labiah heran pulo mancaliak si Kutar sato bagabuang di lapau di sapagi nan dingin tu.

Raso heran urang salapau baru hilang sasudah Si Kutar manjalehan bahaso inyo sadang manunggu kawan bule nyo nan ka tibo. Biasonyo, inyo nan manamui bule untuak dibaok bajalan-jalan mancaliak pamandangan tapi antah apo nan ado di kapalo bule nan ciek ko, inyo nan maminta basuo di kampuang si Kutar.

Nan hadir di lapau katiko itu tampak Tuan Marajo, Tuan Rangkayo, Tuan Bandaro Kayo sarato Tuan Bagindo. Ka-ampek urang ko sumando di kampuang si Kutar sahinggo si Kutar maimbau mereka jo basabuik gala supayo tatap baradaik, ketek banamo gadang bagala.

“Jan lupo mangenalkan ka kami kawan bule si Kutar tu ndak? Kalau labiah sagetek dari yes no- yes no, laie bisa juo kami ko nyo.” Kecek Sutan Marajo ka si Kutar.
“Jadih Tuan, aman tu.” Baleh si Kutar sambia mairuik kopi paiknyo nan lah mulo agak dingin.

Ruponyo, indak lamo antaronyo, barantilah oto di muko lapau dan tampak surang bule turun sambia tapana bantuak ayam diakuak taminum aie hujan. Untuanglah si Kutar bagageh manjapuik ka dakek oto. Sasudah mangecek sapatah duo, disuanyo bule tadi masuak ka lapau. Lalu, diperkenalkannyolah bule ko ka ampek urang sumando di kampuangnyo tu. Bagageh malah ka-ampek-annyo tagak sambia maonyok-an tangan untuak basalam.

“My name is Bagindo.” Kecek sumando nan partamo tasabab sagan dakek si Kutar indak mamakai gala.
“Bagindo?” kecek si Bule manarimo salam sambia malengoh ka Si Kutar untuak mandapek panjalasan sanyampang ado pangaratian Bagindo ko dalam bahaso Inggirih. Paniang juo agak-agak si Kutar ka manjalehan sabab salamoko inyo indak tahu lo namo ketek sumando ko doh.

“The King.” Uleh si Kutar ma-agiah panjalasan tambahan. Tampak muko bule ko pucek pasi mangana jo sia inyo sadang ba-adok-an.

“My name is Rangkayo.” Kecek sumando kaduo ko sambia galak tasengeang sahinggo tampak bakeh rokok digiginyo.

“ Nice to meet you Rangkayo.” Jawek si Bule sambia maulang kato Rangkayo ka-adok-an si Kutar.
“The Millionaire.” Pungkeh si Kutar yakin.
“ My name is Bandaro Kayo.” Sambuik sumando nan katigo.

“ The Banker. ” Bagageh si Kutar manjalehan tanpa manunggu aba-aba si Bule. Tibolah akhiano giliran sumando nan ka-ampek. Baliau ko memang tampak labiah bawibawa dibandiang nan lain sabab pakai kopiah itam di ateh kapalonyo.

“My name is Marajo.” Kecek sumando nan ka- ampek mampakenalkan diri sambia mangganggam arek tangan si bule.

“Nice to meet you too, Marajo.” Kecek si Bule sambia malengoh untuak nan ka-ampek kalinyo ka si Kutar.
“King of the King” jawek si Kutar padek.

 

 

 

ditulis oleh Suherman Kini

Tweet

Subscribe to receive free email updates: